Kosova ka mësuar kundërshtarët e saj në Ligën e Kombeve, pas shortit të hedhur sot (e enjte) në Bruksel.

‘Dardanët’ do të përballen me rivalët e tyre në kuadër të Ligës B, në një edicion që pritet të jetë tejet sfidues dhe vendimtar për të ardhmen e përfaqësueses në këtë garë.

Kosova ndodhet në Grupin B3 bashkë me Izraelin, Austrinë dhe Republikën e Irlandës.

Ndeshjet e para të fazës së grupeve janë planifikuar të zhvillohen nga 24 deri më 26 shtator 2026, ndërsa raundi i fundit do të luhet nga 15 deri më 17 nëntor 2026.

Fituesit e secilit grup në Ligën B do të sigurojnë promovimin në Ligën A për sezonin pasardhës, duke bërë hapin e madh drejt elitës së Evrope. Në anën tjetër, kombëtarja që e mbyll grupin në vendin e fundit do të bie në Ligën C.

Përveç kësaj, vendet e dyta dhe të treta nga secili grup do të kenë një tjetër mundësi përmes play-off-it të ngjitjes ose rënies nga kategoria. Këto përballje do të luhen në dy ndeshje, vajtje-ardhje.

Vendet e dyta nga Liga B do të përballen me vendet e treta nga Liga A për një vend në elitë, ndërsa vendet e treta nga Liga B do të luftojnë për mbijetesë kundër vendeve të dyta nga Liga C.